30 de
xaneiro. Obradoiros e actividais creativas nas bibliotecas nodais.
Obradoiros,
actividades para estimular a creatividade e a imaxinación, mostras
bibliográficas e espazos para a reflexión e a conversa. A Consellería de
Cultura e Educación, a través da Secretaría Xeral de Cultura, propón diversas
actividades dirixidas a todos os públicos e de balde para promover a
celebración, por vez primeira, do Día da Ilustración en Galicia.
As bibliotecas
nodais das catro provincias, situadas en Lugo, Ourense, Pontevedra, Vigo, A
Coruña e Santiago de Compostela, e a Biblioteca de Galicia, na Cidade da
Cultura, serán o escenario desta programación, que conta co apoio da Asociación
Galega de Profesionais da Ilustración.
A Xunta de
Galicia crea esta data o 30 de xaneiro, coincidindo co nacemento de Alfonso
Daniel Rodríguez Castelao, para destacar a importancia da ilustración e do
deseño no libro e na lectura, así como para poñer en valor o sector galego
da ilustración.
Biblioteca Pública de A Coruña
Obradoiro
de ilustración con Xosé Tomás
Inscrición
previa en rbgalicia.xunta.es ou na biblioteca
O ilustrador,
premio Frei Martín Sarmiento 2013 á mellor obra infantil, descubriralles aos
rapaces e rapazas o proceso creativo das imaxes que interactúan coas palabras.
As técnicas de composición, o proceso de elaboración dun álbum, a creación de
personaxes e a ilustración de microrrelatos, poesía e haikus serán algúns dos
segredos que compartirá Xosé Tomás no obradoiro que ofrecerá na biblioteca
González Garcés.
Biblioteca Pública de Ourense
Obradoiro
de ilustración e actividades creativas
Público: a
partir de 12 anos
Ao cargo do
Colectivo Miñoco
O colectivo de
ilustradores Miñoco estimulará a creatividade das persoas que se acheguen á
biblioteca de Ourense a través de diversas iniciativas. Para promover a
creatividade conxunta, organizará a actividade Cadáver exquisito, na que
todos os que se animen poderán deixar a súa pegada artística nun papel continuo
ao iren completando un debuxo inicial.
A imaxinación
será o principal ingrediente doutra das actividades que propón o colectivo para
a celebración do Día da Ilustración, na que os participantes deberán debuxar,
nun tempo breve, unha imaxe que sintetice dous conceptos elixidos ao azar entre
as propostas realizadas polo público. 3
Biblioteca Pública de Santiago de Compostela
Construción
dun mural colectivo
Lugar:
Biblioteca Pública Ánxel Casal
Inscrición
previa en rbgalicia.xunta.es e presentación 10 min. antes do inicio
A través do
programa de Voluntariado Cultural, a biblioteca nodal de Santiago de Compostela
propón un obradoiro dun mural colectivo para achegar os nenos e nenas á ilustración.
Castelao, Colmeiro e Seoane serán os protagonistas desta actividade, que tamén
xirará arredor da figura do editor Ánxel Casal.
Obradoiro
de técnicas de gravado e estampación
Lugar:
Biblioteca de Galicia. Cidade da Cultura (Aula 2)
Público: a
partir de 12 anos
Ao cargo de
Marita Crespo
Inscrición
previa en cidadedacultura.org
A Biblioteca
de Galicia programa un obradoiro creativo para viaxar ata o mundo do gravado e
da estampación, no que os participantes poderán coñecer de primeira man a
técnica do gravado en oco, a máis directa de todas as técnicas calcográficas,
así como as técnicas aditivas, nas cales a imaxe da estampa se crea a partir da
adición de materiais sólidos a un soporte ríxido.
Biblioteca Pública de Pontevedra
Obradoiro
“Era unha vez... a ilustración”
Público:
estudantes de 1º de primaria do CEIP A Laxe 4
Ao cargo de Patricia
Rodríguez Saavedra (IMASV)
Desde as primeiras miniaturas dos manuscritos ilustrados ata
os audiolibros e as técnicas máis novidosas. Esta é a viaxe que realizarán a
través da evolución da ilustración os nenos e nenas que participen neste
obradoiro da biblioteca pontevedresa Antonio Odriozola.
Faladoiro
“A ilustración gráfica hoxe en Galicia”
Con Marina
Seoane, Almudena Aparicio e Manuel Uhía
Modera:
Henrique Torreiro
De forma
distendida e achegada ao público xeral, o faladoiro centrarase no traballo dos
profesionais da ilustración, nos retos aos que se enfrontan na actualidade e
nas perspectivas de futuro que se abriron nos últimos anos, cun progresivo
recoñecemento social da importancia cultural do visual en xeral e da
ilustración en particular.
Henrique
Torreiro modera este faladoiro, no que participarán en diálogo os ilustradores
Marina Seoane, Almudena Aparicio e Manuel Uhía.
Marina
Seoane (Madrid,
1957). Licenciada pola Facultade de Belas Artes de Madrid, ten colaborado con
máis de corenta editoriais, estudios de deseño e organismos oficiais. Ten
ilustrado arredor de douscentos cincuenta libros e é autora de cinco contos.
Varios dos seus libros obtiveron premios e mencións, como do Ministerio de Cultura,
da Lista de Honra do CCEI ou da White Ravens. Autora de varios carteis de
animación á lectura, realizou once exposicións individuais e participou en
numerosas colectivas. Foi directora artística da editorial Edimáter.
Actualmente é a presidenta da Asociación Galega de Profesionais da Ilustración
(AGPI).
Almudena Aparicio (Vigo, 1978). Licenciada pola Facultade de Belas Artes
de Pontevedra, ten traballado desde 2004 como ilustradora de libros de texto,
didácticos e de literatura infantil. É, ademais, coautora do manual Técnicas
de paquetería. Guía práctica para hacer más atractivos sus embalajes (Ideaspropias,
2005). O ano pasado gañou o Plum Pudding Award, convocado pola axencia de
ilustradores británica Plum Pudding e a editorial Egmont, no IlustraTour 2013
(Valladolid).
Manuel Uhía
(Portonovo, 1944).
Estudou pintura na Real Academia de San Fernando e no Círculo de Bellas Artes
de Madrid. Como ilustrador, foi seleccionado en tres ocasións na Bienal de
Bratislava (1993, 1995 e 1999). En 1997 formou parte da lista de honra do
Premio CCEI. No 2000 foi seleccionado polo Ministerio de Cultura para a
exposición A todo color. En 2009, obtivo a distinción White Ravens polo
libro Cactus del desierto, escrito por Roberto Aliaga.
Henrique
Torreiro (Ourense, 1972).
Organizador das Xornadas de Banda Deseñada de Ourense entre 1992 e 2010, é
socio fundador de varias empresas de xestión cultural e editorial. Foi xerente
da FADIP (Federación de Asociaciones de Ilustradores Profesionales) e
coordinador do Observatorio da Ilustración Gráfica. Na actualidade é secretario
técnico da AGPI.
Obradoiro
de ilustración con Óscar Villán
Inscrición
previa en biblio.publica.pontevedra@xunta.es, no teléfono 986 850 838 ou na
biblioteca, de 9 a
14 horas
Os rapaces e
rapazas terán a oportunidade de descubrir a profesión de ilustrador a través da
obra de Óscar Villán, quen tamén compartirá con eles o traballo de distintos
ilustradores e ilustradoras con proxectos diverxentes.
Biblioteca Central de Vigo
Mostra
“Vida e obra dos ilustradores en Vigo"
Do 30 de
xaneiro ao 7 de febreiro
As mostras
bibliográficas tampouco faltarán na celebración deste data. A biblioteca nodal
de Vigo fará un percorrido pola ilustración na actualidade a través dunha
mostra composta por obras dalgúns dos máis importantes ilustradores vigueses
contemporáneos. Pepe Carreiro, Luis Castro Enjamio, Anxo Fariña, Alejandro
Viñuela e David Amoedo son algúns dos artistas que estarán presentes nesta
mostra.
Obradoiro
“As receitas da ilustradora”
Público: a
partir de 6 anos
Ao cargo de
Marisa Irimia
Inscrición en
bibli.central.vigo@xunta.es ou na biblioteca
Marisa Irimia guisará
nesta sesión diferentes receitas, trucos e segredos arredor dos debuxos e
dos contos. Trátase dunha viaxe a través dos libros, coas ilustracións como
protagonistas, para aprender as claves da ilustración e gozar poñéndoas en práctica.
Biblioteca Pública de Lugo
Obradoiro
de ilustración con Xosé Tomás
Inscrición
previa en rbgalicia.xunta.es
Xosé Tomás
compartirá cos máis novos a súa paixón pola ilustración e amosaralles algunhas
das técnicas e pasos principais do proceso creativo arredor do álbum.
Conversa
con Miguelanxo Prado
Museo de Belas
Artes da Coruña
A programación de actividades
rematará no Museo de Belas Artes da Coruña cunha conversa con Miguelanxo
Prado, autor do cartel conmemorativo do Día da Ilustración 2014. O gañador
do Premio Nacional de Cómic 2013 polo traballo Ardalén falará da súa
obra e da situación actual da ilustración, nun coloquio no que o público poderá
coñecer de preto o universo creativo do artista.
