Conta atrás das Letras Galegas: Armando Cotarelo Valedor, 1984





Armando Cotarelo Valledor naceu o 28 de decembro de 1879 en Vegadeo, despois de estudar Filosofía e Letras en Madrid, obtivo a cátedra de Lingua e Literatura españolas na Universidade de Santiago de Compostela no ano 1904, onde chegou a ser vicerreitor e decano.

Integrado no ambiente galeguista, foi membro activo das Irmandades da Fala, ademais de membro fundador e primeiro presidente do Seminario de Estudos Galegos. Asemade formou parte da Real Academia Galega e da Real Academia Española, así como creou e dirixiu a revista Ultreya.

Cotarelo Valledor adicouse a estudar a literatura galega medieval, sendo un dos precursores en Galicia neste aspecto.

En 1925 trasladouse a Madrid e foi nomeado catedrático na Universidade Central. Malia estar considerado un dos líderes da vida cultural galeguista, cando deu comezo a Guerra Civil, foi partidario do levantamento militar e apoiou aos sublevados.

Colaborou en diversos xornais e revistas ao longo da súa vida, ademais escribiu unha novela bilingüe El pazo, e varios contos populares como Contos de nadal colleitos do pobo ou Cancioneiro da agulla enxergado con doas do pobo, mais se nunha disciplina destacou Cotarelo Valledor, foi no teatro, sendo continuador da estética realista da época. De entre a súa produción podemos atopar obras de drama rural Trebón, Lubicán, de ambiente mariñeiro Beiramar, Mourenza, comedia sentimental Sinxebra ou traxedia histórica Hostia.

Os últimos anos da súa vida pasounos en Madrid, onde foi catedrático de Lingua e Literatura Galego-Portuguesa, ata que o 8 de decembro de 1950 finou.

Comentarios

Publicacións populares deste blog

Hoxe recomendamos... "Iridium" de Francisco Castro

Conta atrás das Letras Galegas: Xosé Filgueira Valverde, 2015

Actividades infantís de febreiro