luns, 15 de abril de 2019

Conta atrás das Letras Galegas: Manuel Antonio, 1979





Manuel Antonio Pérez Sánchez naceu en Rianxo o 12 de xullo de 1900 no seo dunha familia conservadora. Cando tiña catro anos falece o seu pai e vaise a vivir coa súa avoa materna e cun tío, polo que pasará a maior parte da súa infancia entre Padrón e Iria Flavia.

Aos once anos trasladouse a Compostela a estudar o bacharelato, é aí onde entra en contacto co republicanismo e o galeguismo. Comezou a estudar a carreira de Filosofía e Letras, pero deixouna para cursar Náutica en Vigo. Nesta época publicáronse varios poemas seus en xornais e revistas como La redención, A Nosa Terra ou Galicia.

En 1921 participou na II Asemblea Nacionalista, onde coñeceu aos membros máis importantes do galeguismo, coma Vicente Risco, entre outros. Dela saíu fortemente convencido polo ideario nacionalista e a política pasou a ser moi importante na súa vida.

A partir de 1922 comezou unha intensa actividade literaria publicando en revistas como Alfar ou Ronsel e ese mesmo ano publicou xunto a Álvaro Cebreiro o manifesto Máis alá!

Entre 1926 e 1927, Manuel Antonio fixo as prácticas de piloto da mariña mercante, sendo nesta época, namentres está embarcado, cando elabora o seu poemario De catro a catro: follas sin data d´un diario d´abordo, publicado en 1928 e que sería o seu único libro publicado en vida.

O 28 de xaneiro de 1930 finou en Rianxo, por mor da tuberculose.

De xeito póstumo publicáronse outros poemarios seus como: Con anacos do meu interior, Foulas, Sempre e máis dispois e Viladomar.


Ningún comentario:

Publicar un comentario

Libros con corazón

Imos poñer a San Valentín como escusa para ensinarvos unha pequena selección de libros en cuxo título aparece a palabra corazón. Se quer...